❗️Ұсталар сәтте журналистің қолында 2 жасар қызы болған

Видеодан оның жанұшыра шырылдап жылағанын естуге болады. Арнайы жасақ баласын тартып алып, журналисті күштеп көлікке отырғызып, алып кеткен. Бұл сәтте оның жанында үлкен ұлы да болған. Оның сөзінше, арнайы жасақ өте дөрекі әрекет еткен. Қарындасының беті сырылып, жарақат алған. Ұлының айтуынша, Олеся Вертинская полицияға өз еркімен шақырту бойынша келген. Кейін журналист прокуратураға арыз жазуға барған. Ғимараттан шыға бергенде, арнайы жасақ қолындағы баласына қарамастан, ай-шай жоқ журналиске бас салған. «Тұтқындалар алдында ол(Олеся Вертинская) өзіне қарсы істің қалай қолдан жасалып жатқаны жайлы егжей-тегжейлі бейнежазба жариялады. Бұл арандату болды. Олеся біреуді қағып кетті дейді-мыс. Бірақ оның көлігі жай тұрған, ал адам қағып кетті дегендей әрекет қылуға тырысқан. Ұсталар сәтте жанында адвокаты болған жоқ», — деп жазды бұл туралы журналист Динара Егеубаева. Олеся Вертинская — Атыраудағы «Дорожный контроль» журналисі. Бұған дейін ол жергілікті полициядан қысым көріп, отбасына қауіп төніп тұрғанын мәлімдеп көмек сұраған еді. Атырауға жаңа полиция бастығы келгеннен кейін журналист қудалауға ұшырағанын айтқан. Олеся Вертинская өңірдегі полиция қызметкерлерінің заңсыз әрекеттерін әшкерелеп, материалдар жариялаған.