Ол «Ханституция» деп жазылған ақ парақты ұстап, бар жоғы 30 минуттай тұрған

28 тамызда жергілікті тұрғын Қуаныш Молдалиев Орал орталығындағы Абай алаңына жеке пикетке шықты. Ол «Ханституция» деп жазылған ақ парақты ұстап, бар жоғы 30 минуттай тұрған. Наразылық акциясын Facebook-те тікелей эфирде көрсетіп, «шыдамы таусылғанын», «заң мен тәртіп жоғарыдан бастап жұмыс істеуге тиіс» деді. Сондай-ақ, Тоқаевтың амандасу жайлы айтқанын сынға алды. Ол бұл жайтты «Солтүстік Корея мен Түркіменстанға айналып барамыз» деп атады. Полиция көп ұзамай Молдалиевті ұстап, көлігіне отырғызып алып кеткен. Кейін әрекетін заңсыз деп, 10 тәулікке қамап тастады. «Уральская неделя» басылымының мәліметінше, Қуаныш Молдалиевтің екі баласы бар, оның біреуі тұрақты күтімді қажет ететін мүмкіндігі шектеулі бала. Ол желіде ерекше балаларды тәрбиелеп отырған отбасылардың мәселесін айтып, мұндай балаларға әрдайым қажетті деңгейде қолдау көрсетіле бермейтінін көтерген.