Оралда белсенді Маруа Ескендір 3 айдан бері бейбіт пикет өткізе алмай келеді

Белсенді екі рет 25 күннен әкімшілік қамауға алынды. 4 қыркүйекте ол үшінші мәрте ұсталды. Сол күні Маруа Ескендір 25 күн әкімшілік қамаудан босап шыққан еді. Белсенді изолятордан шыға сала қайта наразылығын айтып, пикетке шыққан. Ол барар жері болмағанын, 10 сотық жер телімін бермейінше, әкімдіктің маңынан кетпейтінін айтты. «Батыс Қазақстанда 80 мыңнан астам адам жерге кезекке тұр. Біздің бәрімізді лақтырып кетті», — деп белсенді әлеуметтік мәселелерді шешуді және жеке тұрғын үй құрылысына 10 сотық жер бөлуді талап етті. Дегенмен көп ұзамай полицей қызметкерлері белсендіні алаңнан ұстап әкеткен. Еске салсақ, Маруа Ескендір осымен үшінші рет ұсталды. Ол 16 шілдеде аштық жариялап, халықтың әлеуметтік жағдайын жақсартуды талап еткені үшін 25 тәулікке қамалған. 10 тамызда жазасын өтеп шыққан белсенді қайта Абай алаңына шығып, наразыық акциясын жалғастырды. Артынша тағы да дереу ұсталып, қайта 25 тәулікке қамауға алынды. Осылайша 50 жастағы белсенді бейбіт пикетке шыққаны үшін екі айға жуық, 50 күн әкімшілік қамауда отырды.