❗️Күзетшілер бір үзім нанға ақша таппай отырғандарын айтады

Оралда мемлекеттік мекемелерді күзететін «Секьюрити» ЖШС күзетшілері әкімдік алдына наразылыққа шықты. Бұл туралы «Уральская неделя» басылымы жазды. Күзетшілер екі айдан бері жалақыларын алмаған. Салдарынан несиесін төлей алмай, қарызға батқан. Азық-түлікті, тіпті нанды қарызға алуға мәжбүр болған. Олардың айлықтары бар жоғы 85 мың теңге. Күзет фирмасының директоры Сергей Мановицкийдің сөзінше, мемлекеттік ұйымдар көрсетілген күзет қызметі үшін ақшаны уақытында аудармағандықтан, төлем кешіктіріліп жатыр. Жалақысынан қағылған жұмысшылар өздері күзеткен облыстық мәдениет басқармасының бухгалтеріне де жүгінген. Ондағылар «бюджетте ақша жоқ, бәрі құрылтай сайлауына кетті» деп түсіндірген көрінеді. Еске салсақ, тамызда Құрылтай сайлауын өткізуге Үкімет резервінен 34,4 миллиард теңге бөлінді. 2027 жылғы республикалық бюджет жобасында Құрылтайдың қызметін қамтамасыз етуге 22,53 млрд теңге қарастырылған. Бір депутатқа жылына шамамен 155,3 млн теңге жұмсалмақ.