Бүгін мына кісі қайтыс болды. Атырау облысы Доссор кентінде тұратын 62 жастағы Біржан Баетов 13 қаңт…
Бүгін мына кісі қайтыс болды. Атырау облысы Доссор кентінде тұратын 62 жастағы Біржан Баетов 13 қаңтарда өзін өртеп жіберген. Әбден күйген дененің жанында «Әке!» деп кішкентай баласы жүр… Біржан Баевтов жансақтау бөлімінде үш күн жатып, есін жимаған күйі бүгін көз жұмды. Атырау полиция департаменті бұл кісі өзін «отбасындағы жанжалдан соң өртеді» деген. Туыстары да, көршілері де бұған келіспейді. Әйелінің сөзінше, күйеуі «жоқшылыққа шыдамай» осындай қадамға барған. Марқұм ағай көп балалы әке еді. Артында екі ұлы, төрт қызы қалды. Өндірісте қолы жарақаттанып, 3-топ мүгедектігін алған. Содан бері көше тазалаған, мал баққан, аула да сыпырған. Тұрақты жұмысы болмай, кейінгі кезде жұмыссыздар есебінде тұрды. Әкімдік берген жалдамалы үйіне заттарды кредитке алған. Екі қызын ұзатқанда да қарызға батқан. — Қиын болып кетті бізге. Бала-шағама да жеткізе алмай, тамағымды да кредитке, қарызға алам. Қарызды қайтадан берем. Сөйтіп солай менде қиын жағдай болып кетті. Жолдасым да қиналып кетті оған, мен де қиналдым. Сөйтіп жүргенде жұмысым да тұрақты болмады. Екеуміз арасында осылай жанжалдасып, ұрысып қалатынымыз бар. Сол қиындықты көтере алмады жолдасым, — дейді әйелі. Қазақстан аумағында мұнай өндірісі 1911 жылы осы — Доссор кентінен бастау алған. Мұнда 14 мың адам тұрады. Кенттің жүзге жуық адамы ғана жергілікті мұнай өндіру компаниясында істейді. Басқа мыңдаған адам үйдегі қариялардың зейнетақысы мен мұғалім не тәрбиеші болып істейтін әйелдердің жалақысына күнелтіп отыр. Кентте одан басқа табыс көзі жоқ. — Бұл кісінің қазасы жайлы неше түрлі ақпарат беріп жатқан болар жоғарыдан. Мұның бәрін біз терең зерттейтін болсақ, бәрі тұрмыстық жағдайға келіп тіреледі. Халықта жұмыс жоқ. Балаларына жұмыс жоқ. Келген келінде де жұмыс жоқ. Соның бәрі әсер етіп отыр, — дейді жергілікті белсенді Ғазиз Ғабдуллин. Әріптестерім — Айнұр Сапарова мен Әсемгүл Мұхитқызының репортажын Азаттықтан көріңіздер. Марқұмның туыстарына қайғыра көңіл айтамын. Аян Қалмұрат https://www.facebook.com/share/p/asyoP4sgysG6FoBD/?mibextid=WC7FNe