20 минутта аяқталған екінші сот отырысынан кейін жәбірленушінің заңды өкілі бола тұра сотқа қатысуға…

20 минутта аяқталған екінші сот отырысынан кейін жәбірленушінің заңды өкілі бола тұра сотқа қатысуға рұқсат етілмеген Айдос Мелдеханулы сыртқа шыққан күдікті Арман Жұманмен жаға ұстасып қалды. Ызаға берілген әке сотталушының бостандықта жүруіне қарсылық білдіріп, әскери прокурордың келуін талап етті. Ол әскери прокурордан күдіктіге күзетпен ұстау бұлтартпау шарасын тағайындауды сұрады. 4 жасар Айкөркем Мелдехан Қаңтарда оққа ұшқан. Айдос Мелдеханұлының айтуынша, тергеуде 4 күдікті болған, ал сот кезінде бір ғана сотталушы Арман Жұман Игілікұлы айыпталып жатыр. «Атыс қаруын қолданған 4 жауынгер тек куә ретінде қатысуда. Оларға бұйрық берген Арман Жұман ғана жауапқа тартылмақ». Жәбірленуші тарап бұған наразы. 12 томнан тұратын істегі «бір ғана томда құпия мәлімет» жазылған. «Сол үшін барлық процесті жабық етті. Мені қатыстырып, ең болмағанда сол бір том қаралғанда соттан шығарса да болар еді ғой. Енді 20 жастағы ұлым қатысатын болды. Бірақ ол да соттағы мән-жайды жария етсе жауапқа тартылады» дейді Айдос Мелдехан. Қаңтарда әскерилер Айдос Мелдеханның балалары отырған көлікке оқ жаудырған. Салдарынан 16 жастағы үлкен қызына бірнеше оқ тиіп жараланып, 4 жасар Айкөркем қаза болды. Ал 8 жасар ұлы психологиялық күйзеліске ұшыраған.