Маңғыстауда қамауға алынған штаб бастығы Данияр Хайрушевтың жақындары желіде Тоқаевқа қайырылды

Олар президенттен оқиғаның мән-жайын жан-жақты анықтап, істің әділ тергелуін сұрады. Бұған дейін әскери шенеуніктің қызы әкесінің кінәсі анықталмай жатып, көпшіліктен оны айыптамауды өтінген. Еске салсақ, Данияр Хайрушев – Каспийде суға кетіп, көз жұмған 14 әскери қызметшінің қазасына байланысты ұсталған жоғары лауазымды әскери басшылардың бірі. Ол әскери-теңіз күштері бас қолбасшысының бірінші орынбасары. Одан бөлек, іс бойынша екі әскери бөлімнің командирі, теңіз жаяу әскерлері ротасының және «Қайсар» катерінің командирлері ұсталып, Ақтау қаласындағы уақытша ұстау изоляторына қамалған. ІІМ мәлімдеуінше, «қызметіне салғырт қарау» және «кеме жүргізу ережелерін бұзу» баптары бойынша қылмыстық іс қозғалған. Әлеуметтік желіде жұрт қорғаныс министрі Дәурен Қосановты да жауапқа тартуды талап еткен еді. Тоқаев оны лауазымынан босатып, орнына мемлекеттік күзет қызметі департаментінің бастығы Айдос Мырзахметті тағайындады. Оған 10 күнде қарулы күштерді түбегейлі реформалауды тапсырды. Министр жауапқа тартыла ма, жоқ па белгісіз.