Қызылордада «Атажұрт» белсендісі Гүлназ Серікбаеваға үкім шықты
Сот 174 бап «алауыздық қоздыру» бойынша кінәлі деп танып, жалғызбасты ананы 3 жылға бас бостандығынан айырды. Адвокат Абдулла Бақбергеновтың сөзінше, сот процессінің «былығы көп» болған. Ол соттың саяси нұсқаулықпен өткенін айтады. Адвокат мұны белсенділерді қудалау мен тұншықтыру деп бағалады. Филологиялық сараптама «ұлтаралық қақтығыс тудыру, жәбірленуші жоқ» деген қорытындыға келсе де, іс бәрібір бір жақты қаралған. Прокурар 6 жыл сұрап, сот белсендінің қарт мүгедек анасы мен кәмелетке толмаған баласы барына қарамастан, түрме жазасына кескен. Адвокаттың сөзінше, Гүлназ Серікбаеваның қамауда ауыр психологиялық күйзеліске ұшырап, қолын кесіп, дарға асылып өзіне қол жұмсамақ болған. Қылмыстық іс Серікбаеваның 2022-2023 жылғы Facebook жазбалары негізінде қозғалған. Онда белсенді Украинадағы Ресей басқыншылығы айыптап, Қытаймен визасыз режим және ондағы заңсыз қудалау туралы өз ой-пікірін жазған. Биыл 11 наурызда Қызылорда полициясы белсендінің үйінде тінту жүргізіп, қарт анасы мен баласының көзінше күштеп ұстап алып кеткен еді. Оның үстінен желідегі жазбаларына байланысты «алауыздық қоздыру» бабы бойынша қылмыстық іс қозғалды. Белсенді бұған дейін де саяси қудалауға көрген. Ол Марат Жыланбаевты қолдаған жазбасы үшін 10 тәулікке отырып шыққан еді.