Ресми ақпаратқа сүйенсек, серверлер ел аумағында орналасқан

Цифрлық даму министрі қазақстандық «Яндекс» пайдаланушыларының жеке деректері сақталған серверлер қалыпты режимде жұмыс істеп тұр дейді. «Алайда бұл платформаның барлық бөлігі өз алдына дербес жұмыс істейді дегенді білдірмейді. Такси және жеткізу қызметтеріне қажетті жекелеген компоненттер Қазақстан аумағынан тыс жерде орналасқан», – делінген министрлік хабарламасында. Қазір «Яндекс» жұмысын қалпына келтіру жұмыстары жүргізіліп жатыр. Еске салсақ, Қазақстан заңнамасы бойынша «Яндекс» серверлері мен деректерді ел аумағында орналастыруға міндетті. Бұған дейін 2023 жылы экс-министр Бағдат Мусин «Яндекс» серверлерін Қазақстанға толық көшіргенін мәлімдеген еді. Дегенмен өткен демалыста сервис істен шықты. Ақау Ресейдегі Яндекстің дата-орталықтарына жасалған дрон шабуылынан кейін орын алды. Желідегі ақпарат бойынша Қазақстаннан бөлек компанияның Сербия мен Беларусьтегі жұмысы тоқтаған. Жұрт такси шақыра алмай қалғандарын жазды.