«Гиперборей» YouTube-арнасының авторы Вадим Борейкоға қарсы талап-арыз бойынша алдын ала тыңдау өтті

Талапкер «Etude-Ybyrai» құрылыс компаниясы соттың жабық режимде өтуін сұрады. Олардың уәжінше, процесс барысында коммерциялық құпияға жататын мәліметтер айтылып, оны компанияның бәсекелестері өз мүдделеріне пайдалануы мүмкін. Журналистің қорғаушылары соттың жабық өтуіне қарсылық білдіріп, істің қоғамдық маңызы барын алға тартты. Сондай-ақ, қорғаушылар талап қоюшы тараптан нақты қандай мәліметтер компанияның іскерлік беделіне нұқсан келтіріп, шығынға ұшыратқанын нақтылауды сұрады. Адвокаттардың сөзінше, талап арызда бұл көрсетілмеген. Алайда компания өкілдері бұл сұраққа жауап беруден бас тартты. Бостандық аудандық соты сотты жабық өткізу туралы өтінішті қарауды әзірге кейінге қалдырды. Келесі отырыс 26 мамыр сағат 10:00-ге белгіленді. Еске салсақ, сәуірде жрналист Вадим Борейконың банк шоттары бұғатталып, сотқа шақырылды. Құрылыс компаниясы журналисті «жалған ақпарат таратты», «компанияның іскерлік беделіне нұқсанкелтірді» деп айыптап отыр. Олар арызында Борейкодан 71 млн теңге көлемінде өтемақы талап еткен.