2026 ж. 10 маусым
Сотталушылардың жақтастары мен туыстары үкіммен келіспейді. Олар істі қайта қарауын, жақындарының ақталуын талап етіп, наразылығын білдірді. Еске салсақ, 13 сәуірде Талдықорғанда «Атажұрт» ұйымының 19 өкіліне қатысты үкім шықты. Сот 19 адамның барлығын Қытай туын өртегені үшін «кінәлі» деп тапты. 11 адам 5 жылға бас бостандығынан айрылып, қатаң түрме жазасына кесілді. Қалғандары шартты түрде сотталды. Барлығына саяси және қоғамдық жұмыспен айналысуға тыйым салынды. Сот отырысы жабық өтті. Үкім оқылғанда, сот залына журналистерді кіргізбеді. Қылмыстық іске Қытай билігінің нотасы себеп болды. Жуырда Астанаға келмек болған «Атажұрт» белсенділерінің жолын бөгеп, кедергі жасалды. Олар үкімге қарсы талап-арызын айтып, АҚШ елшілігімен кездеу керек еді. Бірақ полиция нақты себебін түсіндірместен, белсенділерді жолда тоқтатып, көліктен, пойыздан мәжбүрлеп түсіріп алып қалды.