Әмір Қасенов 8 күннен бері нәр татпаған

Өткен аптада қамауға алынған ҚазТАГ-тың бас редакторы Әмір Қасенов ауруханаға түсті. 8 күннен бері нәр татпаған журналистің денсаулығы күрт нашарлаған. Адвокат Елена Жигалёноктың сөзінше, жалғыз жұтым суды Қасенов ауруханада дәрі жұту үшін ғана ішкен. Бүгін ол сот отырысына онлайн қосылды. Судья бұл Қасеновтың өз өтініші деп мәлімдеді. Бірақ журналист мұны жоққа шығарып, ондай өтініш жасамағанын жеткізді. Қасенов хәлі мүшкіл екенін айтып, соңғы рет жұбайымен жүздесуді сұрады. «Сегіз күн болды — нәр татпадым, бір жұтым су да ішкен жоқпын. Соны түсінесіздер ме, жоқ па?! Бәрі бітті, әлім құрыды...Өліп бара жатырмын», — деді Әмір Қасенов сотта (видео) Сот отырысы 29 маусымға шегерілді. Адвокаттардың сөзінше, Әмір Қасенов салдарына қарамастан аштықты тоқтатпайтынын мәлімдеп, бекем бел буған. Еске салсақ, кәсіби қызметіне байланысты қудалауға ұшыраған журналист 15 маусымда Алматыда сот залынан қамауға алынды. Бұған дейін ол жарты жыл бойы үйқамақта отырған еді. Әмір Қасенов сот шешіміне қарсы наразылық ретінде сот залында аштық жариялады. Видео: respublikaKZmediа | TG