Маңғыстауда Сaspian food мекемесінің жұмысшылары адал еңбегінің ақысын талап етті.

Олар Тоқаевқа, бас прокурор мен үкімет басшысына, жергілікті әкімдікке үндеу жолдады. Жұмысшылардың сөзінше, мекеме еңбек кодексін бұзып, жұмысшылардың құқықтарын таптап, дискриминация жасап отыр. Компанияда 1600-ден астам адам жұмыс жасайды. Бір лауазымда, бірдей жұмыс атқаратын жұмысшылар әртүрлі жалақы алады. Еңбек кодексіне сәйкес, бірдей жұмыс үшін бірдей жалақы төленуге тиіс. Жұмысшылар заң аясында сотқа, президент әкімшілігі мен бас прокуратураға бірнеше рет арыз жолдаған. Бірақ сот олардың талап-арызын қараудан бас тартқан. Маңғыстау әкімдігі істі қараудан бас тартып, жауып тастаған. Үндеу жасауға кедергі жасап, наразылық білдірген жұмысшыларды полиция бөлімшесіне шақырып, қудалаған. «Біздер өзіміздің жылдар бойы жасаған адал еңбегіміздің ақысын талап етіп отырмыз. Сaspian food басшылары бізге: «Ештеңе істей алмайсыңдар», — деп тікелей айтып отыр», — деді олар үндеуде. Жұмысшылар үндеуге қатысқан жұмысшыларды қудаламауды, 2023 жылдан бері жалақысының кем алып отырған айырмасын төлеп беруді талап етті. Талап 10 күн ішінде орындалмаған жағдайда, жұмыстарын тоқтатпақ. Бұл өңірдегі алғашқы екі еңбек дауы емес. Бұған дейін «Берали Маңғыстау Компани» және «Сенім Тасымал Компани» жұмысшылары жалақы мәселесін көтеріп, видеоүндеу жолдаған.