«Да вы что?»

Тоқаев Дәурен Қосановты лауазымынан босатты. Ол қорғаныс министрі қызметіне былтыр маусымда кіріскен. Биыл құрылтай сайлауынан кейін 3 қыркүйекте қайта тағайындалды. Қосанов министр болған тұсте, елдегі әскери құқық бұзушылық саны артты. 2025 жылы кейінгі бес жылдағыдан 2 есе өсіп, 236 әскери қылмыстық құқық бұзушылық тіркелді (ranking.kz). Олардың 80-і ғана сотқа жолданған. Оның ішінде «әлімжеттік» бойынша күдікке ілінгендердің 22% ғана жауапқа тартылды. Былтыр қарашада әскерде көз жұмған сарбаздардың аналары Астанаға жиналды. Олар сарбаздар өлімі мәселесін көтеріп, әскерде реформа талап етті. Бірақ Дәурен Қосанов аналармен кездесуге шықпады. Қорғаныс министрлігі аналардың жан айқайына жауап бермей, керісінше аналарды күштеп ұстап әкетті. Кейін журналистер министрен әскердегі сарбаздар өлімі жайлы сұрағанда, ол мұны «дәлелсіз» деп жоққа шығарды. Ай сайын сарбаздар өліп жатқаны жайлы сұраққа мысқылдап, «Да вы что?» деп ыржалақтап күліп жауап берген (видео). Еске салсақ, 24 қыркүйек Маңғыстауда оқу-жаттығу кезінде 17 әскери қызметші суға кетіп, оның 14-і қаза тапты. Бұл Қазақстан әскеріндегі алғашқы қайғылы жағдай емес. Биыл жыл басынан бері әскерде кемінде 7 сарбаз көз жұмды. Тағы бірнешеуі соққыға жығылып, ауыр жарақат алып мүгедек болып оралды.