Жаңаөзенде «Казпромтехсервис» ЖШС жұмысшылары үндеу жолдады

Бұған компанияның 8 сағаттық жұмыс режиміне көшуге мәжбүрлеп жатқаны себеп болды. Олар ауысыммен істеп келген. Енді мекеме басшылары еңбек шартын біржақты өзгертіп, жаңа талапқа келіспесе, жұмыстан шығармақ. Ал келіскен жағдайда, жалақылары қысқарады. Видео авторларының сөзінше, 28 қыркүйекте штат жұмысшыларын жұмысқа шығармай қойған. Олардың орнына жеке кәсіпкерлерді жұмысқа тартқан. Жұмысшылар мекемедегі бірқатар заңбұзушылықты атап өтті. Еңбек шартында көрсетілген әлеуметтік пакет төленбеген, тендер талаптары да бұзылған. Мекеме 2024–2028 жылдарға арналған тендерді жеңіп алған. Келісімшарт бойынша штат қызметкерлерінің үлесі 75%-дан кем болмауға тиіс. Ал іс жүзінде негізгі қызметкерлер тек 16%-ды (34 адам) құрап отыр. Қалған жұмысшылар субмердігер арқылы тартылған. Сондай-ақ, жұмысшылар мекеменің техникалық жабдықтары да жарамсыз екенін көрсетті. Жұмыс көліктері ескіріп, әбден тозығы жеткен. Осыған байланысты жұмысшылар Тоқаев пен вице-президенті Ерлан Қаринге, үкімет басшылары мен жергілікті әкімдікке үндеу жолдады. Олар мемлекет басшылығынан және құзырлы органдардан бұл мәселені өз бақылауына алуды сұрады. Жұмысшылар 5 күндік жұмыс режиміне ауысу туралы шешімге келіспейді, өйткені бұл жалақының едәуір төмендеуіне әкеледі. Бұған дейін татуластыру комиссиясын құру туралы хат жолдаған. Бірақ мекеме тарапынан жауап жоқ. Жұмысшылар жұмыссыз қаламыз ба деп алаңдайды. Toiken Media бұл жағдайға байланысты компанияға сауал жолдады, әзір жауап келмеді.