Қорғаныс министрі Дәурен Қосанов екі күннен кейін ғана Маңғыстауға барды
Бұған дейін ол тек видео мәлімдеме жасаумен шектелген болатын. Министр суға кетіп көз жұмған сарбаздардың отбасынан кешіріп сұрап, көңіл айтты. Тізе бүккен министр ешкім «жазасыз қалмайды» дейді. Желіде жұрт сарбаздар қазасына Дәурен Қосановтың өзін жауапқа тартуды, қызметінен кетуді талап етіп жатыр. Бұған дейін министр әскердегі сарбаздар өлімін «дәлелсіз» деп жоққа шығарған. Ол ай сайын сарбаздар өліп жатқаны жайлы сұраққа мысқылдап, ыржалақтап күліп жауап берген болатын. Еске салсақ, 24 қыркүйек Маңғыстауда оқу-жаттығу кезінде 17 әскери қызметші суға кетіп, оның 14-і қаза тапты. Синоптиктер мен ТЖМ өңірде дауыл болатынын алдын ала ескерткен. Оқиғаға қатысты «ауыр зардаптарға әкеп соққан қызметке салғырт қарау» және «кеме жүргізу қағидаларын бұзу» баптары бойынша қылмыстық іс қозғалды. Ресми мәлімет бойынша 5 лауазымды тұлға ұсталып, қамауға алынған.