Алматыда заңгер әрі блогер Әділетхан Молдаханның ісі бойынша сот үкімі шықты

Сот заңгер жалған ақпарат таратты деп 2,5 жылға бас бостандығынан айырды. Сондай-ақ, 5 жылға әлеуметтік желіге шығуға, блогерлікпен айналысуға тыйым салды. Еске салсақ, Әділетхан Молдахан әлеуметтік желіде белсенді заңгер еді. Ол Алматыда үш адамның өмірін қиған жол апатына қатысты анық-қанығын айтып, желіде видео жариялаған болатын. Заңгер Әл-Фарабидегі апатқа шенеуніктің балалары мен лауазымды полицейлердің қатысы барын айтқан. Артынша наурызда қамауға алынып, үстінен қылмыстық іс қозғалды. Іс бірнеше рет созылып, қылмыстық іс аяқталуға жақындағанда, қайта қатаң бапқа сараланған. Әділетхан Молдахан тағылған айыпты мойындаған жоқ, ол сот отырыстарының бірінен кейін «шындықты айттым» деп мәлімдеген болатын.