Ресейден ресми хат түскен

⚡️Бұл туралы энергетика министрі Ерлан Ақкенженов мәлімдеді. Оның сөзінше, БҚО-дағы «Конденсат» мұнай өңдеу зауытында Ресей мұнайы өңделіп, одан шыққан бензин мен дизель отынының 70%-ы қайта Ресейге жіберіледі. «Мен ешқандай кедергі көріп тұрған жоқпын, өйткені өндірілген бензин мен дизель отынының 30%-ы Қазақстанда қалады, ал қалған бөлігі Ресейге жөнелтіледі», - деді министр. Ерлан Ақкенженов бұл келісімнен ешқандай кедергі және санкциялық қауіп көрмейтінін айтады. Министрдің сөзінше, компания санкцияға ілікпеген. Еске салсақ, мұнай зауыттары жарылған Ресей Қазақстаннан бензин сұраған еді. Маусымда Украина Ресейдің мұнай инфрақұрылымындарына ауқымды соққы жасап, елде жанармай тапшылығы туған. Жанармай станцияларында ұзақ-сонар кезек қалыптасып, жұрт бензинге таласып төбелескен. Шекара маңындағы ресейліктер бензин үшін Қазақстанға ағыла бастаған.