Бүгін Көкшетауда саяси тұтқын Амангелді Жахиннің ісі қаралды

Жақтастары мен қорғаушыларының талабына қарамастан, сот процесі қоғамнан жабық режимде өтті. Тіркелмеген «Алға, Қазақстан» саяси оппозициялық партиясының белсенділері Амангелді Жахинді қолдау үшін Көкшетауға арнайы барған. Олар соттың ашық өтуін, қоғамдық бақылауды талап етті. Алайда билік мұны елеусіз қалдырды. «Тоқаев режимі ашық соттан қорқады, себебі шындық ресми үгіт-насихаттың күлін көкке ұшырмақ. Сондықтан саяси процестер қоғамнан, тәуелсіз журналистер мен бақылаушылардан жиі жасырылады. Соттың жабық өтуі — биліктің жасыратыны барын білдіреді», — деп мәлімдеді «Алға, Қазақстан». ️62 жастағы Амангелді Жахин 2025 жылдың 18 қарашасынан бері қамауда отыр. Ол «Алға, Қазақстан» тіркелмеген саяси оппозициялық партиясының жетекшісінің бірі. Оған қылмыстық кодекстің «тыйым салынған экстремистік бірлестіктің қызметіне қатысты», «экстремистік әрекетті қаржыландыруға қатысты қылмыстар жасады» деген айып тағылған. Дәл осындай айыппен 2023 жылы партия лидері Марат Жыланбаев 7 жылға сотталған.