Динара Егеубаева қылмыстық іске себеп болған жол-көлік оқиғасы әдейі ұйымдастырылғанына дәлел ұсынды

Оның сөзінше, оқиға болған күні бейнебақылау камераларындағы барлық бейнежазба полиция келгеннен кейін өшірілген немесе алынып тасталған. Журналистің болжамынша, полиция жергілікті тұрғындарды қорқытып сес көрсеткен. Мұны куәгерлердің бірі растап отыр. Ол «жақындарының өтініші» бойынша барлық видео өшірілгенін айтады. Динара Егеубаева қудалауды тоқтатуды талап етеді. «Өздері өздерін әшкереледі. Фейктер, боттар, жала жабу, видеожазбалардың жоғалуы мен адамдарды қорқыту, екі миллион қарызы бар жұмыссыз велосипедист (басқа да іспен ұсталған болар), туыстарынан оқшаулау, жай жол-көлік оқиғасынан қылмыстық іс жасау — мұның бәрі тек бір нәрсені: ТАПСЫРЫС екенін білдіреді. Әдейі ұйымдастырылған. Мен видеоны жариялағаннан кейін жоспарлары іске аспай қалды», — деп жазды журналист. Тағы бір қызығы, бұған дейін журналиске келген 2 айыппұл жұмбақ жағдайда жоқ боп кеткен. Журналит kaspi қосымшасынан таба алмай қалғанын жазды. Еске салсақ, 31 шілде Динара Егеубаева тұрақтан шығып келе жатқан сәтте, көлігіне жоғары жылдамдықпен бір велосипедші келіп соғылған. Журналистің көлігі тәркіленіп, полиция «көлікпен қағып кетті» деп әкімшілік хаттама толтырды. Алайда кейін қылмыстық іс қозғалғаны белгілі болды. Осыдан кейін Егеубаеваға қарсы ақпараттық шабуыл басталды. Желіде велосипедші «қаза тапты» деген жалған ақпарат тарап, журналистің аккаунттары бұғатталып қалды. Велосипедші өзіне келтірілген шығынды үш миллион теңге деп бағалаған.