29 тамызда Алматыда Аруна Ортаеваның үйінде тінту жүргізіліп, белсендіні бөлімшеге алып кеткен
29 тамызда Алматыда Аруна Ортаеваның үйінде тінту жүргізіліп, белсендіні бөлімшеге алып кеткен. Кейін ол 15 тәулікке қамауға алынды. Бұған белсендінің Көкжайлау жайлы «әкімдіктегі жабық отырыстың» аудиожазбасын жариялауы себеп болған. Ортаева жариялаған аудиожазбада әкімдік қызметкерлері Қызыл кітапқа енген жүздеген түп ағашты кесу жайлы сөз қозғайды. Олар ағаш кесуге салынған тыйымды қалай айналып өтуге болатынын, қоғамдық тыңдауды у-шусыз «қалай дұрыс өткізуді» талқылайды. Белсендінің үстінен қылмыстық кодекстің 148-бабы «хат-хабар, телефон арқылы сөйлесу және басқа да хабарламалар құпиясын заңсыз бұзу» бойынша іс қозғалған. Бұл бапта 8,6 млн теңге көлемінде айыппұл не 5 жылға бас бостандығынан айыру жазасы қарастырылған. Аруна Ортаева — курорт құрылысына қарсы Көкжайлау қорғаушыларының бірі. Бұған дейін ол БҰҰ Бас хатшысы Антониу Гутерришке үндеу жасаған. Белсенділер курорт флора мен фаунаны жойып, Іле-Алатауы ұлттық паркінің экожүйесіне орасан зиян зиян келтіреді деп алаңдайды. Еске салсақ, 2019 жылы Тоқаев Көкжайлауда құрылыс жүргізуге жария түрде тыйым салып, курорт салынбайтынын мәлімдеген. Бірақ биыл SuperSki жобасы бойынша құрылыс жұмыстары қайта жаңданып, ағаштарды жаппай кесе бастады.