62 жастағы Амангелді Жахин 7 айдан бері қамауда, ол «Алға, Қазақстан» жетекшісінің бірі

⚡️12 мамырда сот прокурордың өтініші бойынша Амангелді Жахиннің ісін көпшіліктің қатысуынсыз, жабық өткізу туралы шешім қабылдады. Белсендінің адвокаты мұнымен келіспейтінін және апелляциялық шағым түсірмек екенін мәлімдеді. Ол істі ашық түрде қарауды және көпшіліктің сот процесін бақылай алуын талап етпек. Келесі сот отырысы 19 мамырда сағат 10:00-ге жоспарланған. ️62 жастағы Амангелді Жахин 2025 жылдың 18 қарашасынан бері қамауда отыр. Ол «Алға, Қазақстан» тіркелмеген саяси оппозициялық партиясының жетекшісінің бірі. Оған қылмыстық кодекстің «тыйым салынған экстремистік бірлестіктің қызметіне қатысты», «экстремистік әрекетті қаржыландыруға қатысты қылмыстар жасады» деген айып тағылған. Дәл осындай айыппен 2023 жылы партия лидері Марат Жыланбаев 7 жылға сотталған еді. Сот ұйғарымында Жыланбаев «Қазақстанның демократиялық таңдауы» қозғалысы экстремистік ұйым деп танылғанын біле тұра Астана қаласы аумағында «ҚДТ» ұйымының қызметіне белсенді түрде араласып, Мұхтар Әблязов ұйымдастырған заңсыз митингілерге қатысқан деп көрсетілген. Жахин ісінде де осыған ұқсас айыптар бар.