«Testcom Өзен» жұмысшылары компания басшылығы мен жергілікті билікке үндеу жолдады

«Бәсе» арнасының жазуынша, жұмысшылар 7/7 жұмыс кестесін қайтаруды, жалақыны өсіруді және әлеуметтік төлемдерді толық көлемде төлеуді талап етті. Үндеу авторлары басшылықтың құрғақ жауабынан мезі болғандарын айтып, еңбек заңнамасына сай жұмысшылардың тиісті құқықтары мен бостандықтарын қорғауды, мүлтіксіз сақтауды сұрады. Жұмысшылар жеке және ұжымдық еңбек дауларын шешуге, ереуілге шығуға құқылы екенін атап өтті. Сондай-ақ, бизнестің әлеуметтік жауапкершілігін еске салып, бизнестің қызметкерлерге қолайлы әлеуметтік жағдайларды жасауы керек екенін айтты. Еске салсақ, Маңғыстауда мұнай-газ және оған қызмет көрсететін мердігер компаниялар мен жұмысшылар арасында еңбек даулары жиі туындайды. Жұмысшылардың басты талаптары еңбек құқығын сақтау, елдегі инфляция деңгейіне сай жалақы мен әлеуметтік төлемдерді төлеу, жұмыс жағдайын жақсарту. Бірақ көп жағдайда басшылық наразылыққа тиісті жауап бермегендіктен, жұмысшылардың билік орындары мен қоғам назарын аудару үшін үндеу жолдап, ереуілге шығады.