Құрылтай отырысынан кейінгі брифиңде журналист Ботагөз Омарова БАҚ жұмысын шектеу мәселесін көтерді

Ол аккредитациясынан айырылып қалуы мүмкін болса да, «депутаттар ыңғайсыз сұрақтардан қорқама ма?» деп тікелей сұрады. Бұған құрылтай төрағасының орынбасары Дания Еспаева жауап берді. Ол БАҚ «жұмысы шектелген жоқ, керісінше, ретке келтірдік» деп ақталды. Вице-спикердің сөзінше, құрылтай журналистер үшін әрдайым «ашық». «Бүгін біз кімнің қандай аяқ киім кигенін, кімнің қандай сөмке ұстайтынын талқылаған жоқпыз. Көбіне бұл хайп дүниелер. Халық үшін одан да бүгін қандай заңдар қабылданып жатқаны маңызды», – деп Еспаева өз кезегінде журналистердің депутаттардың жеке өміріне қатысты сұрақтар қоюын сынға алды. Құрылтай төрағасының орынбасары журналистер 145 депутаттың кез келгеніне сұрақ қоя алатынын алға тартып отыр. Бірақ бүгін Құрылтай отырысынан кейін журналистерге арналған баспасөз залына 145 депутаттың төртеуі ғана келді. Оның өзінде, модераторлар журналистерге сұрақтар Құрылтай жұмысының регламентіне қатысты болуға тиіс деп ескерткен. Еске салсақ, жаңа ереже бойынша журналистер тікелей депутаттарға сұрақ қоя алмайды, енді кулуар жоқ. Тек брифиң өтеді, оның өзінде күн тәртібінен тыс сұрақ қоюға тыйым салынған. Күн тәртібіне қатысы жоқ сұрақтар тәртіп бұзу деп бағаланады. Егер журналист екі рет тәртіп бұзса, парламенттегі аккредитациясынан айырылады. Видео: timurasylhanov / IG