Полиция Лұқпан Ахмедияровты 3 сағаттан аса бөлімшеде ұстап, босатты

Бірақ істің мән-жайы әлі белгісіз. Алғашқы қорытындысы таза болғанына қарамастан, журналисті қайта наркологиялық сараптамаға алып кетті. Лұқпан Ахмедияровтың сөзінше, оның үстінен 2025 жылдың 1 наурызында Ресей ІІМ-і әскер туралы жалған ақпарат тарату бабы бойынша қылмыстық іс қозғаған. «Мен Ресейде болмағаныма біраз болды, баруға құлқым да жоқ. Ал полицейлер мені 2025 жылы ол жақта қылмыс жасап, тергеуден қашып жүр дейді. Бұл қайдан шыққаны түсініксіз», — деп айтып үлгерді журналист бөлімшеден шыққан соң. Полиция журналисті «көліктің міндетті сақтандыруы жоқ» деген әкімшілік істі сылтау етіп тоқтатқан. Кейін оған халықаралық іздеу салынғанын, Ресейде қылмыстық іс қозғалғанын айтқан. Лұқпан Ахмедияров қылмыстық істі кәсіби қызметімен байланыстырды. Ол Рауль Упоровпен бірге «Просто журналистика» ютуб-арнасында Путинді сынап, Кремль пропагандасын әшкерелейтін материалдар, Украинадағы соғыс туралы деректі фильмдер шығарады.