Астанада ұсталған «Самұрық-Қазына» және «ҚТЖ» басшылары жайлы не белгілі?

11 қарашада ҰҚК «жемқорлық жасады» деген күдікпен бірнеше адамның ұсталғанын хабарлады. Олардың арасында «Самұрық-Қазына» қорының төрағасы Нұрлан Жақыпов пен «Қазақстан темір жолы» төрағасы Елжас Отыншиев бар. ҰҚК «тергеу құпиялылығы» деп істің жай-жапсарын нақтыламады. Бұған дейін желіде Астанадағы Atlant тұрғын үй кешені маңынан уыс-уыс ақша салынған 8 шабадан жатқаны жайлы ақпарат тараған еді. Журналист Михаил Козачковтың мәліметінше, мұнда 6 миллион доллар қаражат болуы мүмкін. Доллар толған шабаданды ҰҚК үйіне келгенде, күдіктілердің бірінің әйелі балконнан лақтырған көрінеді. Алайда бұл ақпаратты құзырлы органдар әзірге ресми растаған жоқ. «Жемқорлық жасады» деген күдікпен ұсталған Нұрлан Жақыпов 48 жаста. Ол «Самұрық-Қазынаны» 2023 жылдың 3 сәуірінен бастап басқарады. Соңғы үш жылда ол 806 млн теңге табыс тапқан. Кіріс декларациясына сүйенсек, оның табыс көлемі 2022 жылы – 422,1 млн теңге, 2023 жылы – 186,5 млн теңге, 2024 жылы – 197,2 млн теңге болған. 39 жастағы Елжас Отыншиев «ҚТЖ» басқарма төрағасы лауазымына биыл шілде де ғана келген. Бұған дейін ол 2023 жылы «Самұрық-Қазынада» стратегия және активтерді басқару жөніндегі басқарушы директоры, басқарма мүшесі қызметін атқарған.