Бүгін Астанада нөсер жауын жауып, соңы бұршақ араласқан қатты жаңбыр мен желге ұласты

Жарты сағатқа жетер-жетпес уақытта қаланы 1 метрден асатын су басып, көлге айналды. Автобустар мен көліктер су астында қалды. Тұрғындар әлеуметтік желілерде су басқан қала көшелерінен түрлі видеолар жариялап «Астанада апокалипсис» десті. Нөсердің суы жуырда президент Қасым-Жомарт Тоқаев ашқан ЛРТ-ны да аямапты. LRT стансасының бірінің төбесінен көл-көсір су ағып жатыр. Астана қаласының әкімдігі бұл жайтқа бойлары үйренген. Тіпті «Бір мезетте жауын-шашын мөлшері көп болған кезде нөсер кәріз жүйесі суды орта есеппен 40 минуттан бір сағатқа дейін қабылдап үлгереді. Кейбір учаскелерде уақытша шағын су басу жағдайлары байқалады» деген мамыражай хабарлама таратты. Бірақ бұл Астанада бірінші рет емес. Үп еткен жел болса, ғимараттардың қас беттері құлап, қала көшелері суға батады. Тосын күн райы әкімдіктің дайындығы қандай екенін тағы бір көрсетті. Елордалықтардың сөзінше, нөсер жауын бар болғаны 15 минут шамасында төгіп өткен. Соның өзі тұрғындарды біраз әбігерге салды. Көлігі суға толып, астында қалғандар бар. Енді жұрт ертең күз келгенде, не істейміз деп алаңдаулы.