Amanat жаңа «Әділетке» қосылды

Астанада сәуірде ғана құрылған жаңа «Әділет» партиясының съезі өтіп жатыр. Партия делегаттары Amanat-пен бірігу жайлы ұсынысты «бірауыздан қолдап» дауыс берді. Қарсы дауыс бергендер мен қалыс қалғандар жоқ. «Қос партияны бір құндылық пен мақсат біріктіріп тұр, бұл мықты мемлекеттік институт құру, мемлекеттік басқарудың тиімді үлгісін қалыптастыру, бәсекеге қабілетті экономиканы дамыту, әлеуметтік әділдік пен заманауи саяси мәдениетті қамтамасыз ету», — дейді партия төрағасы Айбек Дәдебай. Еске салсақ, жұма күні биліктегі Amanat партиясы «президент айналасындағы прогрессив күштерді біріктіру үшін «Әділет» партиясына қосылатынын мәлімдеді. Артынша «Ақжол» демократиялық партиясы да кезектен тыс съезд өткізіп, партияны 15 жыл басқарған Азат Перуашев қызметінен кететінін мәлімдеді. Оның орнына Дания Еспаева тағайындалды. «Әділет» партиясы биыл сәуірде құрылып, маусымда ресми түрде тіркеуден өтті. Партияны президент әкімшілігінің басшысы қызметін атқарған Айбек Дәдебай басқарады.