Адвокат Шынқуат Байжанов Бәтиқа Біләштің ісіне қатысты мән-жайды айтып берді

Оның сөзінше, әйелдің үстінен 20 шақты адам «алаяқтық жасады» деп арызданған. Олар Бәтиқа Біләш «қандастарға көмек деп алдап ақша жинап, оны өз пайдасына жұмсады» деп айыптаған. Адвокат Шынқуат Байжанов мұның негізсіз екенін айтады. Оның сөзінше, Бәтиқа Біләш ешқашан бұлай ақша жинамаған, ешжерде жарияламаған. Сондай-ақ, адвокат мұндай жағдайда алдымен түсініктеме алып, жәбірленушімен беттестіріп, тек содан кейін ғана іс қозғалуға тиіс. Бірақ полиция ай-шай жоқ түн ортасында тінту жүргізіп, Серікжан Біләштің әпкесін қылмыстық топты ұстағандай күштеп алып кеткен. Оқиға кезінде жасы үлкен әйел қан қысымы көтеріліп, инсульт ала жаздаған. Шынқуат Байжанов істің саяси астары барын, Серікжан Біләшқа қысым көрсету амалы тұрғанын айтады. Адвокат тағылған айыптың ауыр емес екенін ескеріп, әпкесін үйқамаққа босатуды талап еткен. Бірақ тергеу сотына да «жоғарыдан қысым» жасалып, Бәтиқа Біләшті 10 күнге қамауға алған. Серікжан Біләш – Шыңжаңдағы «саяси түзету лагерлерінде» жазықсыз қамалған қазақтар мен ұйғырлардың құқығын халықаралық деңгейде алғашқылардың бірі болып ашық көтерген белсенді. «Атажұрт еріктілері» ұйымының негізін қалаушы. Ұйым Қытайда қысымға ұшыраған, лагерьлерге қамалған немесе құжаттары тартып алынып, Қазақстандағы туыстарымен байланыса алмай қалған қандастардың құқығын қорғаумен айналысады. Серікжан Біләш белсенділігі үшін Қазақстанда қудалауға тап болып, АҚШ-қа қоныс аударған.