2026 ж. 15 сәуір

⚡️Нәзигүл Мақсұтхан Қытай билігінің нотасы негізінде қамау, айыптау заңсыз екенін айтады. Ол құжаттың «процессуалдық мәртебесі жоқ» дейді. Нәзигүл Мақсұтхан — Қытай туын өртегендер ісі бойынша сотталған 19 адамның бірі. Ол тіркелмеген «Атажұрт» қозғалысының заңгері. Заң ғылымының магистрі ретінде «мұндай жағдай әлем тарихында болмаған» деп атап өтті. «Қазақстан әділетсіз, хаос мемлекетке айналған. Ешқандай заң орындалмайды. Конституциялық нормалар қағаз жүзінде ғана, ешқандай азаматтардың құқығын қорғамайды. Қытайдың нотасын қылмыстық іске тігу әлем тарихында болмаған. Бұл нені дәлелдейді? Бұл өзінің тәуелсідігін мойындамау болып саналады», — деді заңгер. Полицейлер оның сөзін бөліп, кедергі келтірді. Нәзигүл Мақсұтханның 4 жыл 8 айға бас бостандығы шектелді. Ағасы Бекзат Мақсұтхан 5 жыл түрме жазасына кесілді. Еске салсақ, бүгін Талдықорғанда «Атажұрт» белсенділерінің ісі бойынша сот үкімі шықты. Қылмыстық іс Қытай билігінің нотасы негізінде қозғалған. Бұған былтыр ұйғыр ауданында өткен наразылық себеп болған. Белсенділер Қытай экспансиясына қарсылық білдіріп, Қытай туы мен төрағасы Си Цзиньпиннің суретін өртеген. Олар Шыңжаңдағы қазақтарды босатуды, Әлімнұр Тұрғанбайды елге қайтаруды талап еткен.