Астанада эко-белсенді Лаура Маликова ұсталып, 10 тәулікке қамалған

Бұл туралы әпкесі хабарлады. Белсендінің ісі әкімшілік кодекстің 488-бабы 7-бөлігі (бейбіт жиналыстарды ұйымдастыру және өткізу тәртібі туралы заңнаманы бұзу) бойынша сараланған. Одан бөлек, оның үстінен «көрінеу жалған ақпарат тарату» 274 бап бойынша қылмыстық іс қозғалған. Қазір Лаура Маликова әкімшілік қамауда. Ол наразылық ретінде аштық жариялаған. Жақындары созылмалы демікпесі барын, үш рет жедел жәрдем шақырылғанын айтады. Олар белсендіге қажет дәрі-дәрмектерін бере алмай отырғанын, оның денсаулығына алаңдайтындарын жеткізді. Қамауға алынбай тұрып белсенді желіде полицияға куәгер ретінде шақырылғанын айтқан. Ол полицейден кімнің арызданғанын, не себепті шақырып жатқанын сұрайды. Бірақ мардымды жауап ала алмаған. Мұның алдында белсенді желіде жәрдемақыны алып тастау мәселесін көтеріп, халықты санатқа бөлуді сынаған. Сондай-ақ, халықтың ашық наразылық білдіруін, бейбіт жиынға шығуын заңды құқығы екенін атап өтті.