❗️Иаков Воронцовтың ісі жабық қаралады #қазақстанжаңалықтары #қазақстан #жаңалықтар

Бүгін сот отырысында прокурор «куәгерлер қауіпсіздігіне алаңдайтынын» айтып, сот процесін жабық өткізуді сұрады. Қорғаушылардың қарсылығына қарамастан, судья прокурордың сот процесін жабу туралы өтінішін қанағаттандырды. Воронцов конституциялық құқығы бұзылғанын ескертіп, сот шешіміне наразылық ретінде аштық жариялады. Адвокат Ғалым Нұрпейісовтың сөзінше, істен «есірткі притонын ұстау» айыбы алынып тасталған. Бірақ «есірткі сақтады» деп айыптап отыр. Воронцовтың өзі бұл айыпты үзілді-кесілді мойындамайды. Ол өзіне қарсы қозғалған істі саяси тапсырыс, «Ресейдің қудалауы» деп есептейтінін айтады. Еске салсақ, Украиндағы соғысты айыптап, інжілді қазақша оқыған дін қызметкері Иаков Воронцов биыл 13 ақпанда ұсталды. Ол «есірткі тұтыну, сақтау» бабы бойынша айыпталып жатыр. Кейін Воронцов Алматы облысы Ақтастағы республикалық психиатриялық ауруханаға мәжбүрлі түрде жатқызылды. Иаков Воронцов 2022 жылы Ресей басқыншылығын айыптап, Украинадағы соғысқа қарсы болғаны үшін Орыс православие шіркеуі (РПЦ) оны діни қызметкер шенінен айырған. Осыдан кейін ол Қазақстанда Мәскеуге бағынбайтын тәуелсіз православ бірлестік құрмақшы болды. Бірақ Әділет министрлігі тіркеуден бас тартты.