Ол сот отырысына өз еркімен келген

Алайда оны сот ғимаратының алдында бір топ полицей күштеп ұстап, алып кетті. Видеодан оның қарсылық танытып, «бәрібір өз айтқанымнан қайтпаймын» деп айқайлағанын естуге болады. Журналист Вадим Борейконың жазуынша, ұсталған азамат — Ахридин Хамракулов. Естеріңізде болса, наурызда Санжар Боқаев ұсталғаннан кейін желіде оның видеосы тараған еді. Онда Хамракулов полициядан азаптау мен қысым көргенін айтып жанұшыра көмек сұрайды. Ол видеода ағаш кесуге қатысты оқиға бойынша Санжар Боқаевқа жала жауып, айыптауға мәжбүр болғанын айтады. Кейін ол видео желіде тарап кеткен соң алғашқы айтқанынан айнып, жоққа шығарды. Бүгін Алматыда қоғам белсендісі Санжар Боқаев пен жиені Мадияр Қалменов, видеограф Ұлан Нүсіпқожанға қатысты сот процесі басталды. Тергеу мәліметінше, қылмыстық іс 5 бап бойынша қозғалған: аса ірі көлемдегі алаяқтық, ақшаны заңдастыру, ұрлық, ағаштарды заңсыз кесу және жалған ақпарат тарату.