Әкесі Алмас Тілеповтың сөзінше, ұлы мүшкіл хәлде. Ол 50 келіге дейін азып кеткен.

Алматыда Думан Мұхаммедкәрімнің жақындары мен жақтастары баспасөз жиынын өткізіп, вице-президент пен бас прокурорға үндеу жасады. Думан Мұхаммедкәрім өзіне түрмеде қысым жасалып жатқанын айтқан. Журналист шағымын жеткізу үшін наразылық ретінде аштық жариялап, түрлі заттар жұтқан. Бірақ шағымына тиісті назар аударылмаған соң екі рет өзіне қол салуға әрекет жасаған. Салдарынан Думан Мұхаммедкәрім қатты қажып, денсаулығы нашарлаған. Ол 2024 жылдан бері 600 күннен астам уақыт бойы жеке камераға оқшауланған. Алмас Тілепов мұндай қатыгездік пен ауыр тәртіптік жаза қолданудың заңдылығын тексеруді сұрады. Ол ұлының тағы да өзіне қол жұмсау әрекетіне баруына жол бермеу үшін тиісті шаралар қабылдауды талап етті. Бұған дейін журналист қамауда отырған Қызылордадағы №60 мекеменің әкімшілігі оның өзіне зиян келтіруге әрекет жасағанын жоққа шығарған. Думан Мұхамедкәрім Қызылорда түрмесіне ауыстырылған күннен бастап, оның азабы да басталған. Сол күннен бері ол қайта-қайта карцерге қамалып, жетпістен асқан әке-шешесі ұлдарын көре алмай келеді. Белсендіні ата-анасымен кездестірмей жатыр. Анасы уайымнан, көзі көрмей қалған. Еске салсақ, Думан Мұхамедкәрім — билікті сынап, азаматтық белсенділігі үшін саяси қудалауға ұшыраған тәуелсіз журналист, «Ne Deidi» ютуб-арнасының авторы. Елдегі саяси-әлеуметтік оқиғаларды айтып, 2022 жылғы Қаңтар оқиғасынан хабар таратқан. 2024 жылы «экстремизмді қаржыландырды» деп айыпталып 7 жылға сотталды.