Армения ресейлік әскери-саяси ұйым ҰҚШҰ-дан кетуге түпкілікті дайын

Премьер-министр Никол Пашинян парламентте сөйлеген сөзінде Ереванның ҰҚШҰ-дағы мүшелігін жандандыру жоспары жоқ екенін кесіп айтты. «Алдағы бес жылда ҰҚШҰ-ға қайта оралу жоспарымызда жоқ. ҰҚШҰ-дағы жұмысымызды жандандырмаймыз деп сенімді түрде айта аламын. Ұйымның жарғысына сәйкес, елді ұйымнан шығарып тастауға болады. Егер ҰҚШҰ Арменияны шығару туралы шешім қабылдаса, мен қатты қуанар едім. Бұл бізді ұйымнан «шығу керек пе жоқ па» деген диллемадан босатады», — деді Пашинян. Ол жақын арада Арменияның Еуродаққа кіруге ресми өтінім беруі мүмкін екенін айтты. ҰҚШҰ – 1992 жылы Мәскеудің бастамасымен құрылған әскери-саяси ұйым. Оған Ресей, Беларусь, Армения, Қырғызстан, Қазақстан, Тәжікстан кіреді. Мүше елдер ұйымға жыл сайын үлестік жарна төлейді. 2022 жылы Қаңтар оқиғасы кезінде Тоқаев осы ұйымнан көмек сұрады. 6 қаңтарда ең бірінші болып ресейлік әскерилер Қазақстанға жетті. Армения да таулы Қарабақ қақтығысы кезінде ҰҚШҰ-дан көмек сұраған. Алайда ұйым тарапынан қолдау болмады.