Сондай-ақ, Қазақстанға бес жыл мерзімге кіруіне шектеу қойылды.

Бұл туралы Астана полициясы хабарлады. Сот шешімімен Ресей стимері Ксения Гузаева елден шығарылып, Қазақстанға бес жыл мерзімге кіруіне шектеу қойылды. Fasoollka лақап атымен танылған стимер жуырда Қазақстанға келіп, тікелей эфирлер жүргізген еді. Ол эфирде қазақтарды кемсітіп, Қазақстан мен Пәкістанды бір деп, Алматыны «ауыл» деп атайды. Сондай-ақ, «Павлодар біздікі» деп мәлімдейді. Стимердің мәлімдемесі әлеуметтік желіде қызу талқыланып, көптің наразылығын тудырды. Нәтижесінде полиция тікелей эфирде арандатушылық және әдепсіз сипаттағы пікірлері үшін оны әкімшілік жауапкершілікке тартты. «Қазақстан шетел азаматтары мен ел қонақтары үшін ашық мемлекет. Бұл ретте, Қазақстан Республикасының аумағында болу заң талаптарын мүлтіксіз сақтауды, сондай-ақ елімізге, оның азаматтарына және жалпыға ортақ мінез-құлық нормаларына құрметпен қарауды талап етеді», деп ескертті Астана полициясы.