Бұл туралы ол Toiken Media-ға айтып берді
Ағыбаев Әділ «Қазақмыс» корпорациясында 2005 жылдан бері жетекші инженер болып еңбек еткен. Ол кейінгі жылдары қудалауға тап болып, екі мәрте компаниядан заңсыз жұмыстан шығарылғанын айтады. 2023 жылы компания Әділ мен тағы үш қызметкерді негізсіз жұмыстан босатқан. Олар сотта өз құқықтарын дәлелдеп, жеңіп шыққан соң қайта жұмысқа алынған. Бірақ осыдан кейін қызметкерге тұрақты қысым көрсетіле бастаған. 2026 жылы «қызмет қысқаруына» байланысты деп екінші рет жұмыстан шығарылған. Бір қызығы, Әділ Ағыбаевтың орнына Астанадан басқа адам қабылданған. Осыған байланысты ол мұны «қысқарту» емес, әдейі қасақана жұмыстан босату дейді. «Қазақмыс» Toiken Media-ға берген ресми түсініктемесінде оқиғаны растады. Бірақ компания заң аясында болғанын алға тартады. 2025 жылы Цифрландыру қызметінде ұйымдастырушылық өзгеріс жүргізіліп, салдарынан бірқатар штат бірлігі қысқартылған. Қызметкердің мәлімдемесіне қатысты корпорация тек сот шешіміне сүйенеміз дейді. «Қазақмыс» ЖШС еңбек қатынасының заңдылығына берілетін баға субъективті пікірге емес, нақты фактілер мен сот шешіміне негізделуі тиіс деп есептейді» делінген компания жауабында. Ағыбаев Әділ жұмыстан шығаруын заңсыз деп тануды, қайта жұмысқа алуды, жұмыссыз қалғандағы жалақысын өндіріп алуды талап еткен. Бірақ 2026 жылы маусымда сот бұл арызды қанағаттандырудан бас тартқан. Сондай-ақ, компания соңғы жағдай бойынша қызметкердің өзін ар-намысқа, қадір-қасиетке және іскерлік беделді қорғау бойынша сотқа берген.