Депутаттар Тоқаевтың сөзін жақтап граффити үшін жазаны күшейтуді ұсынды

«Әділет» партиясының депутаты Мейрамбай Кемалов құрылтай отырысында граффити мәселесін көтерді. Ол мұны «өткір мәселе» деп атады. Депутат көше суретшілерін «Сергек» арқылы анықтап, «вандализм қаупі жоғары аймақтар картасын» құруды ұсынды. Кемалов көше суретшілері үшін арнайы қабырғалар бөлу керек дейді. Сонымен қатар, депутат салынған суреттерді жедел өшіру немесе бүлінген нысандарды қалпына келтіру үшін арнайы жедел топтар да құрылуы керек деп атап өтті. Бұған дейін Қасым-Жомарт Тоқаев граффити салатындарға қатаң шара қолдануды және мұндай «өнерге» заңмен тыйым салу керек деп мәлімдеген. Артынша премьер-министр Олжас Бектенов Ішкі істер министрлігіне заңнамалық түзетулер әзірлеуді тапсырды. Соған байланысты ІІМ граффити үшін жазалау туралы бөлек ереже дайындап жатыр. Қазақстанда, әсіресе, Алматыда жиі саяси тақырыпта көше суреттері салынады. Бірақ көп ұзамай олар бірден өшіріледі. Мәселен, 4 қыркүйекте Мұстафина көшесінде Көкжайлауды қорғаймын деп қамалған белсендінің суреті пайда болды да, келесі күні өшірілді. Мыңбаев көшесінде қаңтарда оққа ұшқан Айкөркем мен Назарбаевтың граффитиі бірнеше сағат қана тұрды.