Бұл видео былтыр белсенді Эльвира Бекзадинаның қызының туған күнінде түсірілген

Қыздары және оның достарымен саябақта отырғанда, мереке ортасына полиция кіріп келіп шырқын бұзған. Бекзадина полицейге балаларымен жүргенін, кейін бөлімшеге баруға дайын екенін айтады. Бірақ бір топ полицей оны тыңдамай, жалғыз әйелге жабылып, күштеп итеріп көлікке отырғызып алып кетеді. Артында қыздары анасын іздеп шырылдап жылап қалған. Бұл «Алға Қазақстан» партиясының белсендісі, кәмелекетке толмаған 2 қыздың жалғыз асыраушысы Эльвира Бекзадинаға қарсы алғашқы психологиялық қысым, қудалау емес. Биыл 1 маусым «Балалар күнінде» белсенді екі жылға бас бостандығынан айырылды. Бекзадинаға «полиция қызметкеріне дене жарақатын салды және балағаттады» деп айыптаған. Бірақ сотта оқиғаның толық мән-жайы, полицияның заңсыз әрекеттері ашып көрсетілмеген. Тек кәмелетке толмаған балаларын қорғамақ болған белсендінің ана ретінде эмоциялық реакциясын көрсетіп, соның негізінде ғана айып таққан. Еске салсақ, Эльвира Бекзадина былтыр 16 желтоқсанда ұсталып, үйқамаққа алынды. Белсенді кіші екі қызымен бірге үйден шығып, 1986 жылғы құрбандарға гүл қоюды жоспарлаған. Бірақ белсендіні қыздарының көзінше ұстап әкеткен және соққыға жыққан. Бөлімшеде «тексеру» деген сылтаумен қыздарын шешіндіріп, жалаңаш күйінде жеке телефонға түсірген. Бірақ бұл жағдайға ешқандай құқықтық баға берілмеді. Керісінше полицейлер «жәбірленуші» болды.