Видеодан Жұмағалиевтің жанұшыра «маған подстава жасады, қалтамды қара!» деп айғайлағаны естіледі

Ақтау полициясы Маңғыстау облысындағы «Қазақстанның демократиялық партиясы» белсендісі Мұратбай Жұмағалиевтің «есірткі затын сақтады және пайдаланды» деген күдіпен ұсталғаны туралы ақпарат таратты. 46 жастағы Мұратбай Жұмағалиев 3 маусымда Ақтаудағы 22 шағынауданда ұсталған. Ол сәрсенбіде Жаңаөзеннен Ақтауға арнайы келіп, ары қарай Астанада денсаулығына байланысты ем-дом алуы тиіс болған. Видеодан Жұмағалиевтің жанұшыра «маған подстава жасады, қалтамды қара!» деп айғайлағанын естуге болады. Белсендіге Қылмыстық кодекстің «есіртікіні заңсыз сақтады, тасымалдады» деген 296-баптың 4- тармағымен қылмыстық іс қозғалған. Жұмағалиевке алдымен 296-баптың 2-тармағымен қозғап, кейін прокуратура оны 4-тармаққа ауыстырған. Ал 2-тармақпен «160 АЕК дейінгі мөлшерде айыппұл салуға не 160 сағатқа дейінгі мерзімге қоғамдық жұмыстарға тартуға не 40 тәулікке дейін қамау» болса 4-тармаққа сай 3-7 жылға бас бостандығынан айыру жазасы қарастырылған. Мұратбай Жұмағалиев 2011 жылғы полиция оқ атып таратқан Жаңаөзен қырғынының қатысушысы. Ол билікті жиі сынайтын, белсенді позициясымен танымал. Бұған дейін белсендіні белгісіз біреулер ұрып та кеткен. Жұмағалиев «бұл әрекеттердің саяси астары бар» деп мәлімдеген.