Бекзат Мақсұтханның әйелі Нұргүл Ибраева күйеуімен бес айда әзер жолыққан

12 қарашада «ұлтаралық алауыздық қоздырды» деген айыппен бес жылға абақтыға қамалған «Атажұрт» тіркелмеген ұйымының мүшелері Алматыда баспасөз мәслихатын өткізді. Олар қамаудағы туыстарының денсаулығына алаңдайды. 5 жылға бас бостандығынан айырылған «Атажұрт» қозғалысының лидері Бекзат Мақсұтханның әйелі Нұргүл Ибраева күйеуімен бес айда әзер жолыққан. Ол күйеуін көргенде танымай қалғанын айтады. 90 келі болған Бекзат Мақсұтхан 60 келіге дейін қатты жүдеп кеткен. Жиынға басқа сотталғандардың да туыстары қатысты. Олардың барлығы да түрмедегі туыстарының  денсаулығының нашарлап, оларға тиісті көмектің  көрсетілмей отырғанын мәлімдеді. Халықаралық адам құқықтарын қорғау ұйымдарын «Атажұрттың» жағдайына назар аударуға үндеді. «Атажұрт» — Қытайдың Шыңжаң аймағындағы этникалық қазақтар мен басқа да түркі тілдес аз ұлт өкілдерінің құқығын қорғаумен айналысатын ұйым. Оның 19 мүшесі қазір түрмеде отыр. Оның 11-іне  5 жылға түрме жазасы, 8 адамға 4 жыл 8 айдан 5 жылға бас бостандығын шектеу жазасы тағайындалған. Оған ұйым мүшелерінің Қытайдың үйрету лагерінде азапталып жатқан қазақтарды босатуды талап етіп, Қытай туы мен Қытай басшысы Си Цзиньпиннің портретін өртеуі себеп болған.  Наразылыққа қатысқандарды сот «Ұлтаралық араздықты қоздырды» деп айыптаған.