Гүлжан Мұратбай азаматтық белсенді Әлібек Сәбитовтың әйелі.

Ол өзі де әлеуметтік желіде белсенді, билікті сынап, азаматтық ұстанымын ашық білдіріп келеді. Бұған дейін ол жәрдемақының қысқаруына наразылық білдірдіп, оның орнына министрлер мен депутаттарға берілетін 11 түрлі жеңілдікті алып тастауды ұсынған. Тағы бір жазбалардың бірінде ол елдегі жағдайды сынап пікір білдірген (скрин). Сол үшін үйіне бір емес 3 полицей келіп, бөлімшеге алып кетпек болған. Олар әйелдің жазбасын ақ параққа шығарып алып, мұны «қорлау» деп түсіндірген. Әйелдің үстінен әкімшілік кодекстің «ұсақ бұзақылық» бабы бойынша іс қозғамақ көрінеді. Бұл бапта айыппұл салу не 5 тәуліктен 10 тәулікке дейін қамау жазасы қарастырылған. Гүлжан Мұратбай екі аптадан бері конъюнктивитпен ауырып, ешқайда шыға алмайтынын жеткізді. Ол полицейлерден өзінің үстінен кімнің арыз түсіргенін, жазбаны кім «қорлау» деп тапқанын сұрады. Бірақ олар нақты жауап бере алмады. Тек желіде мониторинг жасайтын топ барын айтып, «жалпы солай» деп қана түсіндірді. Сондай-ақ, видеода Гүлжан Мұратбай бұл алғашқы рет жағдай емес екенін атап өтті. Ол күйеуі мен өзінің саяси белсенділігі үшін үнемі қысым көріп, қудалауға ұшырап келе жатқанын айтты.