Марқұмның әкесі кіші ұлдарын ешқашан әскерге жібермейтінін айтып, мұң-зарын жеткізді

Каспийде көз жұмған 20 жастағы матрос Мейрамбек Бердіханның жерлеу рәсімінен видео тарады. Онда жақындары сарбаздың денесін мәйітханадан жай таксиге салып, үйіне жөнелте салғанын айтады. «Мына елде бір есті адамның болмағаны ма? Мейрамбектің денесін таксиге салып жіберген. Әскерге көшеден ұстап әкетеді, өлген хабарын дарбазаның сыртында хабарлайды, ендігісі мынау. Біздің мақсат хайп жинау емес. Осы жағдайдың ел ішінде маңызы бар уақытында резонанс жасап, кінәлі адамдардың жазалануы үшін салып жатырмыз», - деп жазды видео авторы. Марқұмның әкесі кіші ұлдарын ешқашан әскерге жібермейтінін айтып, мұң-зарын жеткізді. Бұған дейін желіде әскерилердің көз жұмған сарбаздардың қазасын темір қоршау ішінен естірту жасағандары қоғамда наразылық тудырған еді. Халық құзырлы органдардың адам өмірі мен қара жамылған отбасыларға немқұрайлы қарайтынын айтып, бейбіт күндегі сарбаздар өліміне шағымын білдірген. Енді таксимен келген табыт көптің ашуына тиді. Еске салсақ, 24 қыркүйек Маңғыстауда оқу-жаттығу кезінде 17 әскери қызметші суға кетіп, оның 14-і қаза тапты. Аман қалған сарбаздар жағаға өздерін жүзіп шыққандарын айтады. Бір күн бұрын синоптиктер мен ТЖМ өңірде дауыл болатынын алдын ала ескерткен.