Белсенді бірнеше сағаттан кейін қайта ұсталып, сот шешімімен тағы да 25 тәулікке қамалды

10 тамызда Оралда белсенді Маруа Ескендір бостандыққа шықты. Ол шілдеде наразылық акцияға шығып, аштық жариялағаны үшін 25 тәулікке қамалған еді. Алайда белсенді бірнеше сағаттан кейін қайта ұсталып, сот шешімімен тағы да 25 тәулікке қамалды. Күндіз қамаудан шыққан соң Маруа Ескендір бұған дейін өткізуге мүмкіндік берілмеген аштық акциясын жалғастыратынын айтып, алаңға келген. Ол халықтың әлеуметтік жағдайын көтеріп, жақсартуды талап етті. Көп ұзамай полиция белсендіні ұстап әкетті. Сол күні кешке онлайн сот өтіп, Маруа Ескендір қайта «бейбіт жиын тәртібін бұзды» деп айыпталып, қамауға алынды. Белсенді наразылық акциясы туралы әкімдікке хабарлама бергенін, бірақ ондағылар жауап қайтармағанын айтады. 50 жастағы Маруа Ескендірова — Орал қаласының азаматтық белсендісі, қоғамдық-саяси, бейбіт жиындар мен адам құқықтарын қорғау мәселесін көтеріп келеді. Азаматтық-саяси белсенділігі үшін бірнеше рет қудалауға ұшыраған.