Сот прокурор сұраған жазаны тағайындап, Воронцовты төрт жылға түрме жазасына кесті
Алматыда Орыс православие шіркеуінің (РПЦ) бұрынғы діни қызметкері Иаков Воронцовқа қатысты үкім шықты. Сот прокурор сұраған жазаны тағайындап, Воронцовты төрт жылға түрме жазасына кесті. Ол «есірткі сақтады» деп айыпталып, қамалған еді. Иаков Воронцовтың өзі тағылған айыпты мойындамады. Бұған дейін ол өзіне қарсы қозғалған істі саяси тапсырыс, «Ресейдің ісі» деп есептейтінін айтқан. Адвокат Ғалым Нұрпейісов істі заңсыз деп үкімге апелляциялық шағым беретінін мәлімдеді. Еске салсақ, Воронцов биыл ақпанда ұсталды. Үйін тінту кезінде психотроптық зат табылып, қамауға алынған еді. Кейін Воронцов Алматы облысы Ақтастағы республикалық психиатриялық ауруханаға мәжбүрлі түрде жатқызылды. Бірақ дәрігерлер оның денсаулығынан ешқандай психикалық ауытқу таппады. Иаков Воронцов 2022 жылы Ресей басқыншылығын айыптап, Украинадағы соғысқа қарсы болғаны үшін Орыс православие шіркеуі (РПЦ) оны діни қызметкер шенінен айырған. Осыдан кейін ол Қазақстанда Мәскеуге бағынбайтын тәуелсіз православ бірлестік құрмақшы болды. Бірақ Әділет министрлігі тіркеуден бас тартты. видео: Вадим Борейко