Әскерге сау жіберіп, табытын алған аналар жылдар бойы әділдік таппай келеді

Әскери қызметін өтеу кезінде қаза тапқан сарбаздардың отбасы мүшелері жиналып, Алматыда баспасөз жиынын өткізді. Әскерге сау жіберіп, табытын алған аналар жылдар бойы әділдік таппай келе жатқанын жеткізді. Олардың бірі — Қайсар Сұлтановтың анасы Сәуле Тілеуберген. Ол ұлының өзіне қол жұмсағанына үзілді-кесілді сенбейді. «Ұлымның иегіне екі рет оқ атылған, арасы 5-6 минут. Үш жылдан бері бұл іс суицид деп саналып келеді. Бірақ ешқандай дәлел жоқ. Керісінше, ұлымның өлтірілгеніге бұлтартпас дәлелдер, сот-медициналық сараптамалар бар. Мен ұлымның қылмыстық ісін ғана емес, басқа балалардың да ісін әділ қарауды талап етемін», — дейді ұлын жоқтап қалған ана. Жиынға жиналғандар әскердегі өлім-жітім мәселесін қозғап, сарбаздар қазасына қатысты істің объективті тергелуін, кінәлілердің жауапқа тартылуын талап етеді. Алмас Шахимовтың анасы Индира Туғанбаева 4 жылдан бері ұлының өліміне кінәлілерді таппай келеді. Оның сөзінше, ұлы әскерде азаптауға ұшыраған. Оған 26 жерден пышақ сұғылған. Бірақ әскерилер сарбаз темір шатырдың астында қалып қаза тапты деген. Аналар өз шағымдары мен талаптарын айтып жатқанда, тікелей эфир өтіп жатқан Қазақстан халықаралық адам құқықтары бюросының баспасөз орталығында электр қуаты өшіп қалды. Салдарынан өзге аймақтан бейнебайланыс арқылы қосылуы керек болған басқа аналармен байланыс үзілді. Ұйымдастырушылар баспасөз мәслихатын түстен кейін қайта жалғастырмақ болғанда, электр қуаты тағы да сөніп қалған.