Айжан Тілепова Тоқаевқа қайырылып, ағасын Алматыдағы мекемеге ауыстыруын талап етті

Ол заң бойынша Думан Мұхамедкәрім жазасын Алматы облысындағы мекемелердің бірінде өтеуге тиіс екенін атап өтті. Думан Мұхамедкәрім Қызылорда түрмесіне ауыстырылған күннен бастап, азапқа ұшыраған. Белсенді қайта-қайта карцерге қамалып, 1 жыл 8 айдан бері сонда отыр. Бірнеше рет наразылық ретінде аштық жариялады. Дәрі, батарея жұтып өзіне зиян келтірмек болды. «Бұл – жеңілдік сұрау емес. Бұл – заңның орындалуын талап ету. Бұл – қартайған ата-ананың ұлын көруге деген үміті. Бұл – адамның ең қарапайым құқығының сақталуын сұрау. Бір сәтке Думанды емес, оның ата-анасын елестетіңізші. Күн сайын телефонға үмітпен қарайтын, «баламнан бір хабар келер ме екен» деп өмір сүріп отырған қос қарияны... Олар артық ештеңе сұрамайды. Бар тілектері – ұлдарын көру», – деді Айжан Тілепова. Қарындасының сөзінше, Думан Мұхамедкәрімді әке-шешесімен кездестірмей жатыр. Былтыр сәуірде ғана Айжан Тілеповамен қысқа уақытқа жүздескен. Белсендінің жетпістен асқан әке-шешесіне де психологиялық қысым көрсетіп, кедергі келтірілуде. Күні кеше Алмас Тілепов пен Халимаш Рымбекқызын полицейлер қуалап жүріп ұстап, жолынан қалдырған. Олар ұлын Алматыға ауыстыруды талап етіп Астанаға жолға шыққан.