Марқұм сарбаздардың отбасына көмек үшін ашылған қор қаражатының нақты есебі ашық жарияланбады

Маңғыстау облыстық қоғамдық кеңесінің төрағасы Бекмұрат Жүсіпов арнайы комиссия қаражатты бөлу жұмысын аяқтағанын мәлімдеді. Қаржылай көмек қаза тапқан 14 әскери қызметшінің отбасылары мен оқиғадан аман қалған үш сарбазға бөлінген. Алайда оларға қандай көмек берілгені белгісіз. Бекмұрат Жүсіпов туыстарының өтініші бойынша төлем алушылардың жеке мәліметтері жарияланбайтынын алға тартты. Еске салсақ, 24 қыркүйекте Каспий теңізінде әскери оқу-жаттығу кезінде қатты жел соғып, 17 әскериді су ағызып әкеткен. Салдарынан 14 сарбаз қаза болды. Тек үш сарбаз өздігінен жағаға жүзіп шығып, аман қалды. Қайғылы оқиғадан кейін қаза тапқандардың отбасыларына көмек көрсету үшін бірыңғай «Ұлттық рух» қоры құрылды. Құрылтай депутаттары атынан 146,6 млн теңге, Қазақстан Халық Кеңесінен 815 млн теңге, Әділет партиясынан 1,5 млрд теңге және Halyk қорынан 25 млн теңге түскені хабарланған болатын. Бұл ақпаратқа сүйенсек, қорға 2,8 млрд теңгеден аса қаржы жиналды. Дегенмен қор қаражатының нақты есебі ашық жарияланбады. Желіде азаматтар қор қаржысын жасыруды әділетсіздік деп наразылық білдірді. Олар жалпыұлттық қайғылы оқиғадан кейін нақты қанша қаражат жиналғаны және қандай көмек берілгені ашық жариялануға тиіс деп атап өтті.