"Қытайдың нотасын екі етпей істеп отыр"

13 cәуір күні Талдықорғанда соттан кейін бір топ «Атажұрт» белсенділерінің туыстары N71 мекемеге келді. Бұл жерден қас қарая 4 жыл 8 айдан 5 жылға дейін бас бостандығын шектеу жазасын алған бес адам - Қанат Тұрдыбай, Бақытнұр Нұрмұқан, Беделхан Қабыләшім, Нұркелді Нұрсап, Ақжігіт Бейсенәлі абақтыдан шықты. Бас бостандығы 5 жылға шектелген Асылхан Қолхаев TOIKEN MEDIA’ға «істеген ісіме өкінбеймін, біздің әрекетіміз дұрыс» деді. Бақытнұр Нұрмұқанның әкесі «осыдан кейін Тоқаев пен Назарбаевқа қалай ішіміз жылиды» деп налыды. Ал 5 жыл түрме жазасы кесілген тоғыз адамға туыстарын жолықтырмады. Түрме қызметкері «оларды әлі соттан әкелмеді» деді. Бірақ олар сот үкім оқығанда залда болмады. Ең қызығы түрмеге кеш батып, жұмыс уақыты аяқталса да қарапайым киім киген бірнеше адам мен прокурор келді. Маңайды полиция жасақтары мен штаттық киімдегі Ұлттық қауіпсіздік өкілдері қоршап тұрды.