ҚазТАГ-тың бас редакторы Әмір Қасенов Тоқаевқа үңдеу жолдады.

Ол өзіне қатысты қылмыстық қудалауды «заңсыз» деп санайтынын және мұны кәсіби қызметімен байланыстыратынын мәлімдеді. Журналист істің ашық сотта қаралуын талап етті. Ол өз ұстанымын көпшілік алдында қорғауға дайын екенін жеткізді. «Іс жүзінде мені оқшаулап тастады: интернетке кіруге, компьютерде жұмыс істеуге, телефонмен сөйлесуге тыйым салды. Тіпті туған анаммен де араласуға болмайды. Жұбайым мен үш баламнан бөлек, жалғыз араласатын ортам – полиция, сот, прокурор және менің адвокаттарым. Маған қарсы қозғалған қылмыстық қудалаудың бірден-бір мақсаты – менің көпшілік алдында сөйлеуімді тыйып, аузымды жабу екені анық», — деді ол үндеуінде. Әмір Қасенов 2025 жылдың желтоқсанынан бері үйқамақта отыр, ол «жалған ақпарат тарату» ісі бойынша айыпталуда. Агенттік үстінен Freedom Finance компаниясы арыз түсірген. Компания Әмір Қасеновке «сыни материалдарды өшір; көпшілік алдында кешірім сұрап, теріске шығар; бұдан былай Freedom Finance тақырыбын қозғама» деген талап қойған. Бас редактор 1-ші және 3-ші талаппен келісіп, 2-шісінен үзілді-кесілді бас тартқан. Ол тек өз жұмысын атқарғаны үшін кешірім сұрауға түбегейлі қарсы.